PARASHAT BERESHIT

 

IPI JEH'A LEISET KISEM HAM?

Torah chu Bereshit ahung hitoh kilhon in ipan thah kit tau vin ahi.Torah in Ipi jeh'a Thilsem ho chungchang thu'a ahin pat ham?Mefarshim hon ihin hil dan uvin Ama leh Ama cham'a Leiset hi kisem ahipoi ti ijil doh nading uva hung kipan ahi ati uve.Rambam in chi jeh'a chu Mitzvah lah'a amasa pen chu Pathen tahsan ding hi ahi ati.(Sefer haMitzvot Ase 1).Tahsan na nei lou chun ipi ti Torah chu atuh chah got ham?Ahithei lou ahi!!

Sod lang'a Thudoh khat chu Ipi jeh'a Pathen in Leiset ahin sem ham?Adonbut na chu ahileh Pathen chu Apha ahi in,Apha chun thilpha abol lou leh,iti Apha kiti thei ding ham?.Chi jeh'a chu Pathen in Leiset chu ahin sem ahi.Lhagao ho jouse chu Leiset'a ahung kum suh masang chun Jah chat na/Je chan na Changlhah in ana hing uve.Ajehchu Toh doh nei lou'a Free'a Hinna dinga Lhagao Changlhah neh hi Lhagao hon hahsa asa lheh uve tin Mekubalim hon ei hil uve.

Mesilat Yesharim Bung 1 na achun hitin aki jih e.Rabbi Moshe Khayim Lutzato(Ramkhal) in Khakhamim tehon hitin eihil uve ati,I'um nau Leiset hi Olam Haba ading'a kiguon tup namun ahi.Olam haba chu ahileh Pathen toh Iki nai na'u nopsah namun ding ahi.Leiset ahin Pathen toh Iki nai be be thei cheh nading uvin Patepna jat jat in Pathen in ihin Patep uve.Patepna ho ijo uva chuleh Mitzvot tamtah ibol lai chan uva Pa Hashem toh iki inai na'u chu Olam haba a nuopsahna hi ding ahi.Chi Nuopsahna het thei nading leh muthei nading'a Chi Leiset hi kisemlo ahi.Chi chun asei nuom chu Eiho,Imacha lou Mihem ho ading'a Leiset kisem ahi ti ahi.

Beith Shamai toh Beith Hillel ho chu Kum 2 leh keh jen Pathen in Mihem asem ding pha ham or pha lou ham ti ana kibui uve.Khat ho sei dungjui in Pathen in Mihem ana asem lou sang in Ana sem aphajoi ati uvin,Khat kit hon Ana sem sang in Ana sem lou aphajoi ati uve.Achaina'a aki nuop tuo nau chu Ana sem sang in Ana sem lou aphajoi ti ahi.Hijeng jongleh Akinuop tuo nau hi Pathen kin/thu nahsah lou  milham ho chungchang thu ahin Hinlah Tzaddik khat'a ding in vang Ana sem lou sang in Ana sem aphajoi ti ahi.

Hilchetna dang khat kit chu ahileh Reshit kiti jouse ading'a Leiset chu kisem ahi akiti.Reshit kiti ho chu ahileh Khokhmah,Israel,Khala,Bikkurim.etc.Hilchetna dang khat kit chu ahileh Pathen in Leiset hi Keima Loupina ding'a kasem ahi ati.

Mi tamtah in Chi Leiset hi Natoh na gam dan in akoi uvin.Ahinai,Natoh na gam ahinai.Hinlah Natoh kibol hi A'Purpose ahipoi.Ipi jeh'a na itoh uham?Hinkho'a Neh le chah le apoimo ho kichoh'a kihinsuo nading ahi mabang'a Lhagao lam'a ibol jouse jong uhi Lhagao lam'a kihinsuo thei nading ahi.Ahinkho lhung kei uvin Sum hol nan Phat jouse amang uvin ahi.Gemara Masekhet Kiddushin in hitin akimu e.Khakhamim tehon hitin asei uve.Thi jou nung'a Chunglang'a Mihem hinkho kitan na'a akidong masa pen chu Torah najil hinam ti ahi?Chi Thudoh hi adonbut thei lou itam'a itam diu ahi.Abul lang'a ina sei tau vin Ihung kisem lo uchu ahileh Torah leh Mitzvot ho bol'a,Khomer kiti jouse Tzurah suo doh ding chu ahi.

PARASHAT BERESHIT

 ATHAH BEH'A KIPAT

Semtil'a Pathen in Vaan le Leiset ahin sem chun..[Bereshit 1:1]

Khakhamim tehon chi Pasuk mei mei akon'a Thil jouse mu thei ahi e ati uve.Ihetsa mabang uva Torah chu Beith(ב) a akipan e.Seder dungjui a isim leh Beith hi Thucheng ho lah a dinga Ani(2) na ahi e.Ivrit lekhajem mong mong hi Ending ho pang lou a 22 alhing jou e.Ending ho toh isim tha leh 27 ahi e.Atbash tichu ale lang'a isim leh Lekhajem Beith(ב) hi 21 na ahi e.Chilai a kon mudoh thei chu Leiset hi Torah pansan'a Pa Hashem in ahin sem ahin.Beith a asem jeh chu seder dungjui a Beith(ב) hi Rosh Hashana nikho teni avetsah ahin.Ale lang a isim leh 21 na ahin.Avetsah chu Hoshana Rabba nikho ahi.Rosh Hashana chu Mihem jouse thu kitan nikho ahin,Hoshana Rabba chu Thu kitan ki khumkha na nikho ahi e.

Midrash akon ijah jing khat uchu Pa Hashem in leiset ahin semding chun Ivrit Lekhajem jouse Pa Hashem koma ahung uvin Kei Lekhajem in leiset sem in tiin ahung tao cheh uve.Dohna khat chu Ipi jeh'a Alef hung masa pen lou ham?Thil jouse Atahpen pa akon a kipan hilou ham?Tichu Otiyot(lekhajem) dang jouse in Alef chu Atahpen ahina dol'a Jana apeh diu dol hilou ham?Adonbutna chu Pathen in Leiset asem ding'a chu Tav thuchang hi apoimo pen ding'a kigel ahi.Ihetsa mabang uva Tav(ת) hi Torah,Tefilah,Teshuva,Tekhiyat Hametim thucheng kipatna ahin.Leiset hi khuom thum'a ding ahin.Chi thum(3) ho lah'a chu Ni(2) hi Tav thuchang a kipan ahijeh a chu Tav hin agel leh kei'a leiset akisem lou leh koi a kisem ding ham ati a hung kipandoh ahi e.Hijongleh Torah a kide ding aum lou leh Torah chu apan na ding ipi um ham ti Tav(ת) thuchang chun ana hetlou ahi.Chichu Alef(א) thuchang'a kipan Adam chu hung hiding ahi e.Alef ahung masat pen lou jeh chu Alef in Torah,Tefilah toh Teshuvah aum lou leh Imacha ding jou ponte ati ahi.Atahpen pa akon kipan ahinai hijongleh Torah ahung hiteng Achingpen pa akon kipan ahi e.Chihna kiti chu Torah akon hung potdoh ahi jeh'a chu Alef kipan masa pen lou ahi e.

Beith(ב) akon Torah ahung kipat jeh ihet pen uchu Beith chu Brakha thucheng kipatna ahin.Pathen in Brakha a Leiset asem lo na chu Rakhamim(khuotona) lentah ahi e.Ajehchu Torah,Tefilah chuleh Teshuvah chu poimo lheh jongleh chiho Takhlit(purpose) chu Brakha ahi e.Torah jil pan Pa Hashem Brakha adei jeh a ajil,asim ahin.chumabang a chu Tefillah leh Teshuvah jong chu Brakha dei jeh ahi.Brakha kitichu Pathen alung lhai lou leh aum poi.Pathen khuotona chu Torah,Tefillah toh Teshuvah hoitah a ibol lou jongle kichang ji ahinai hijongleh Mikhat in Hoitah'a Torah,Tefillah toh Teshuvah abol tengle Brakha chu akimu tei jui e.

Toldot Yosef Lekhabu'a Rav David Lhungdim in ajih na achun Beith(ב) thuchang hin avetsah chu Torah shebe'al peh[Oral Torah] toh Torah SheBiktav[written Torah] ahi ati.Chi teni mang cha a leiset hung kisem ahi.Koi hileh Torah sheBiktav pa apom a,Torah shebe'al peh pom lou chu Yehudi ahipoi.Chumabang achu Khatjoh joh pom lou jong chun Beith(ב) thuchang chu Alef(א) asuo ahi e.Alef chu Arur(gaosap na) thucheng kipatna ahi.

Rabbi Eliezer in Tishrei a leiset hung kisem ahi ati.Tishrei lha hi Midat hadin ahi.Thu tan na ngen ahi.Chijeh achu Tishrei hi Otiyot kile lang hung kiguol ahi e.Tav,Shin,Reish chuleh Yud.

Aipi pi hita leh Isei nuom uchu Beith(ב) hi Pa Hashem in Leiset semna a ahin mang'a,Torah lekhabu thengthou chu ahin pat bang'a Khakhamim tehon jong Gemara lekhabu patna a anei u ahi.Asei na uva chun Alef'a ahung kipat lou jeh chu Mikhat in Gemara asim seh leh Kasim chai nai poi ti agel'a akineosah jing thei na ding keo hilou'a Gemara jil kakipan nai poi tia akigel jing thei nading ahi ati uve.Adang khat chu Gemara jil ding kitichu thil bei ahi poi.Mikhat chun Gemara jil ding lunggel ahin nei teng Yetzer hara ahat'a hat jui ahi e.Chijeh a chu Koi hileh Gemara lekhabu mai'a hung kitung thei kiti chun Alef ahin chai ahi tai akiti chijeh'a chu Beith(ב) a kipan ahi.Tuchung Simkhat Torah chu hoitah in akimang thei tapon.Chuna ban'a ihin muol lem san u Isopi te uh tamtah aum in.Hijongleh Athah beh'a kipat ding hi ilunggel u va Igel cheh ngai u ahi e.