Parashat Khukat!
Tuchung I parasha uva hin Para adumah chungchang akisei in ahi.Hetthem lou a kijui dan tamtah aum in.Chitobang dan ho chu khok ahiloule khukim akiti e.Para Adumah jong hi khok khat ahi e.
Midrash Rabba in khok kiti chu hitin hilchetna apiehbe e.Zoth Khukat tichu "Chondan ho".(Bemidbar 19:2).Chuleh Iyov 14:4 a akisei bang in Mihiem bang a thil boh lah a thil theng khatcha kiloidoh ponte.Pathen bou in Thilboh lah akon Thil theng aloidoh thei e."Rasha khat akuon Tzaddik hung pieng,Tzaddik khat a kuon a Rasha hung pieng.Tekahna a Terakh akuon a Avraham,Akhaz akuon Khizkiyahu,Amon akuon a Yoshiahu,Shimi akuon Mordechai,Ahsi hou ho akuon Israel,Olam Haze akuon a Olam Haba.Innsung a mikhat athi leh a inn theng ahivang a athi pa tongkha jouse boh.Para adumah bol chu kisu boh a Asuhtheng ding mihiem pa theng.Koi in chiho jouse abol ham?Ama tilou Abol Imadang aum poi chuleh Ama tilou Abolthei Imadang aum poi.Ama in khok(Chondan)asem in,Chuleh Ama tilou Imadang in Thutan(gezerah bol) abol poi.Adei dan leh Abol dan in thiljouse aum in koima dang in Athu apel thei poi.
Khatvei Rabbi Khanina Ben Dosa in kiddush ading in wine anei po e.Rabbanit nu in Rabbi Khanina koma chun wine aum lou chu ahung sei in ahi leh Rabbi Khanina in lungkham hih in thil jouse chu Pathen in thu atan khum dan dan a kilheh thei ahi e ati.Chie inlang lengpithei thuh(Vinegar) chu hin la in ati.Rabbanit nu injong aga la in Rabbi Khanina koma chun ahin choi in apie tai.Rabbi Khanina in chi lengpithei thuh chu ave in hitin asei e,"Pathen thil jouse adei bang a hisah thei pa in Ju kisuo sah hen,"ati leh akisuoh jieng in ahi.
Kahin sei nuom chu Pathen Tahsan na dihtah inei phat uva Iha pan phot uleh thil jouse chu Pathen in adei dan tah a akhel mo aum poi.
