17th TAMUZ ANN NGOL.
*Mishnah Taanit 4:3 in ana record e.Hamsedna thil nga(5) Tamuz taarik 17 nin ana lhung e.
1.Songpheng masa chu Moshe Rabbeinu in Sinai mol a akum lhah'a Israel te bongnou lim semthu asem leh ahou na'u maicham asem'u amu phat in che ni hin ana sukeh in ahi.
Israel chaten Bongnou lim semthu ahou jeh uvin Moshe Rabbeinu Sinai mol'a Torah la ding'a aum lai tah in Pa Hashem in Kum suh in ati in ahin sol suh e.Torah ahin kisan jou in ahung kum suh in ahileh Israel chaten milim semthu ahou'u amu phat in Torah chu Israel chate peh ding anom ta poi.Chijeh chun Torah aum na'a nung koi ding ati leh Upa lamkai hon anung koi got amu phat uvin Moshe Rabbeinu ahung kichu pi uve.Achu doh jou po uve.Torah thuchang hon Bongnou lim semthu amu phat uvin vanchung a alengtou uvin ahileh Torah suong pheng chu ahung gih in Moshe Rabbeinu in adop jou lou jieh in akheh lhah sah in asu keh'e tin Midrash khenkhat in asei uve.
2.Beith Hamikdash amasa pen phat lai a Nisim seh'a ato'u Maicham chu che ni hin ana tang e.
Ajieh chu Maicham ato diu chu ahung lhung ding aban ni li ading toh koisa in ana koi jui uve.Galmi tehon khopi bang ahin suh set jou uva Jerusalem khopi asu se uvin,Kohanim teho umna Muntheng mun jong ala go uvin hinlah 7th Av chen chun ana la thei po uve.Galmi te ho khopi ahung lut jou'a kipat in Maicham'a atuo diu gancha ahung lhom ta in ahi.9th Tamuz'a Galmi te ahung lut jou uva kon 13th Tamuz chen ding Gancha to ding (ahung lhung ding ni li ading toh ana koi tha jui jieh uvin) ana nei uve.Ipi ti 17th Tamuz a Maicham nisim seh a ato'u chu tang ham?13th Tamuz chen'a ding'a anei u hilou?13th Tamuz akuon 17th Tamuz chen chun Galmi sepoy ho guhthim in sum ape uvin ama ho koma ana cho jui uve.
3.Beith Hamikdash ani na phat lai in khopi bang chu ana suh set pat nikho'u ahi e.
Titus leh a'sepoy hon che nikho hin Jerusalem bang asu se uvin Jerusalem ana lut uve.
4.Beith Hamikdash ani na phat lai ma in che ni hin Apustamus mi phalou pa in Torah ana hal in ahi.
Hoilai mun a Torah chu ana hal?
Rabbi Acha in lod lamsuom'a ana hal'e ati.Rabbi tehon Tarlusa lamsuom'a ana hal e ati.
Roman te vaipoh kiphin na len kipat nading kum 16 masang,Roman mi palai'a pang Camanus phat lai a thilsuoh ahi tin Khang thu hisap hon ngaidan anei uve.Chuleh,
5.Beith Hamikdash ani na phat lai ma in che ni hin milim semthu muntheng sunga ana koi uve.
Apustamus miphalou pa mama in milim semthu chu muntheng sunga ana koi dan in mi tamtah in asei uve.
Beith Hamikdash masa pen phat lai ma in Khopi bang chu ana suse uvin ahi.Hinla Beith Hamikdash masa pa phatlai a khopi bang ki suh set nikho chu 9 Tammuz ahi.Hinla Mipi teho suh genthei lou na ding in lha khat a ni(day) ni(2) ann ngol ding in ana bol po uve hinla 17 tamuz nikho ma'a ann ngol ding in ana sei uve.Ajieh chu Beith Hamikdash ni na pa kisuh set joh chu hamsedna len tah jo dan a akilah jeh ahi e.
Talmud Yerushalmi in Beith Hamikdash amasa pa bang(wall) akisuh set ni jong chu 17th Tamuz ma ahi e ati.Mi pi hon hahsatna nasatah athuh jeh uchun 9th Tamuz dan in ana he uve ati.Pathen in jong kacha te genthei na'a kei jong kajao'e ti vetsah na in Israel chaten atahsan nikho u 9th Tamuz dan in Yeremiah themgao ana sei sah e.
